ab to apne pas hain kewal bichhDe yaron ki taswiren

ab to apne paas haiñ keval bichhḌe yāroñ kī tasvīreñ

ḳhālī dastar-ḳhvān pe jaise hoñ pakvānoñ kī tasvīreñ

majbūrī ke pinjre se maiñ tum ko jaate yuuñ taktā huuñ

jaise parinda dekh rahā ho uḌte parindoñ kī tasvīreñ

ek tasavvur aisā bhī hai ham tum saath meñ baiThe hoñ aur

apne bachche khīñch rahe hoñ phir ham donoñ kī tasvīreñ

aaj to aise bijlī chamkī bārish aa.ī khiḌkī bhīgī

jaise bādal khīñch rahā ho mere ashkoñ kī tasvīreñ

ik ik kar ke maiñ ne apne chehre gine jab tauba tauba

chhoTī sī dīvār ke uupar itne chehroñ kī tasvīreñ

kamre kī tasvīr gavāh hai dil meñ bhī tum hī rahte ho

varna ghar meñ kaun sajātā hai yuuñ ġhairoñ kī tasvīreñ

aa bhī jaao tasvīroñ se kab tak dil bahlā.eñ āḳhir

darvāzoñ se paar nahīñ kartīñ darvāzoñ kī tasvīreñ

ab to apne pas hain kewal bichhDe yaron ki taswiren

KHali dastar-KHwan pe jaise hon pakwanon ki taswiren

majburi ke pinjre se main tum ko jate yun takta hun

jaise parinda dekh raha ho uDte parindon ki taswiren

ek tasawwur aisa bhi hai hum tum sath mein baiThe hon aur

apne bachche khinch rahe hon phir hum donon ki taswiren

aaj to aise bijli chamki barish aai khiDki bhigi

jaise baadal khinch raha ho mere ashkon ki taswiren

ek ek kar ke main ne apne chehre gine jab tauba tauba

chhoTi si diwar ke upar itne chehron ki taswiren

kamre ki taswir gawah hai dil mein bhi tum hi rahte ho

warna ghar mein kaun sajata hai yun ghairon ki taswiren

aa bhi jao taswiron se kab tak dil bahlaen aaKHir

darwazon se par nahin kartin darwazon ki taswiren