achanak dilruba mausam ka dil-azar ho jaana

achānak dilrubā mausam kā dil-āzār ho jaanā

duā āsāñ nahīñ rahnā suḳhan dushvār ho jaanā

tumheñ dekheñ nigāheñ aur tum ko hī nahīñ dekheñ

mohabbat ke sabhī rishtoñ kā yuuñ nādār ho jaanā

abhī to be-niyāzī meñ taḳhātub kī sī ḳhushbū thī

hameñ achchhā lagā thā dard kā dildār ho jaanā

agar sach itnā zālim hai to ham se jhuuT hī bolo

hameñ aatā hai patjhaḌ ke dinoñ gul-bār ho jaanā

abhī kuchh an-kahe alfāz bhī haiñ kunj-e-mizhgāñ meñ

agar tum is taraf aao sabā-raftār ho jaanā

havā to ham-safar Thahrī samajh meñ kis tarah aa.e

havāoñ kā hamārī raah meñ dīvār ho jaanā

abhī to silsila apnā zamīñ se āsmāñ tak thā

abhī dekhā thā rātoñ kā sahar-āsār ho jaanā

hamāre shahr ke logoñ kā ab ahvāl itnā hai

kabhī aḳhbār paḌh lenā kabhī aḳhbār ho jaanā

achanak dilruba mausam ka dil-azar ho jaana

dua aasan nahin rahna suKHan dushwar ho jaana

tumhein dekhen nigahen aur tum ko hi nahin dekhen

mohabbat ke sabhi rishton ka yun nadar ho jaana

abhi to be-niyazi mein taKHatub ki si KHushbu thi

hamein achchha laga tha dard ka dildar ho jaana

agar sach itna zalim hai to hum se jhuT hi bolo

hamein aata hai patjhaD ke dinon gul-bar ho jaana

abhi kuchh an-kahe alfaz bhi hain kunj-e-mizhgan mein

agar tum is taraf aao saba-raftar ho jaana

hawa to ham-safar Thahri samajh mein kis tarah aae

hawaon ka hamari rah mein diwar ho jaana

abhi to silsila apna zamin se aasman tak tha

abhi dekha tha raaton ka sahar-asar ho jaana

hamare shahr ke logon ka ab ahwal itna hai

kabhi aKHbar paDh lena kabhi aKHbar ho jaana