ada-e-ishq hun puri ana ke sath hun main

adā-e-ishq huuñ puurī anā ke saath huuñ maiñ

ḳhud apne saath huuñ ya.anī ḳhudā ke saath huuñ maiñ

mujāvarān-e-havas tañg haiñ ki yuuñ kaise

baġhair sharm-o-hayā bhī hayā ke saath huuñ maiñ

safar shurūa to hone de apne saath mirā

tū ḳhud kahegā ye kaisī balā ke saath huuñ maiñ

maiñ chhū gayā to tirā rañg kaaT Dālūñgā

so apne aap se tujh ko bachā ke saath huuñ maiñ

durūd-bar-dil-e-vahshī salām-bar-tap-e-ishq

ḳhud apnī hamd ḳhud apnī sanā ke saath huuñ maiñ

yahī to farq hai mere aur un ke hal ke biich

shikāyateñ haiñ unheñ aur razā ke saath huuñ maiñ

maiñ avvalīn kī izzat meñ āḳhirīn kā nuur

vo intihā huuñ ki har ibtidā ke saath huuñ maiñ

dikhā.ī duuñ bhī to kaise sunā.ī duuñ bhī to kyuuñ

varā-e-naqsh-o-navā huuñ fanā ke saath huuñ maiñ

ba-hukm-e-yār laveñ qabz karne aatī hai

bujhā rahī hai? bujhā.e havā ke saath huuñ maiñ

ye sābirīn-e-mohabbat ye kāshifīn-e-junūñ

inhī ke sañg inhīñ auliyā ke saath huuñ maiñ

kisī ke saath nahīñ huuñ magar jamāl-e-ilāha

tirī qism tire har mubtalā ke saath huuñ maiñ

zamāne bhar ko patā hai maiñ kis tarīq pe huuñ

sabhī ko ilm hai kis dil-rubā ke saath huuñ maiñ

munāfiqīn-e-tasavvuf kī maut huuñ maiñ 'alī'

har ik asiil har ik be-riyā ke saath huuñ maiñ

ada-e-ishq hun puri ana ke sath hun main

KHud apne sath hun yani KHuda ke sath hun main

mujawaran-e-hawas tang hain ki yun kaise

baghair sharm-o-haya bhi haya ke sath hun main

safar shurua to hone de apne sath mera

tu KHud kahega ye kaisi bala ke sath hun main

main chhu gaya to tera rang kaT Dalunga

so apne aap se tujh ko bacha ke sath hun main

durud-bar-dil-e-wahshi salam-bar-tap-e-ishq

KHud apni hamd KHud apni sana ke sath hun main

yahi to farq hai mere aur un ke hal ke bich

shikayaten hain unhen aur raza ke sath hun main

main awwalin ki izzat mein aaKHirin ka nur

wo intiha hun ki har ibtida ke sath hun main

dikhai dun bhi to kaise sunai dun bhi to kyun

wara-e-naqsh-o-nawa hun fana ke sath hun main

ba-hukm-e-yar lawen qabz karne aati hai

bujha rahi hai? bujhae hawa ke sath hun main

ye sabirin-e-mohabbat ye kashifin-e-junun

inhi ke sang inhin auliya ke sath hun main

kisi ke sath nahin hun magar jamal-e-ilaha

teri qism tere har mubtala ke sath hun main

zamane bhar ko pata hai main kis tariq pe hun

sabhi ko ilm hai kis dil-ruba ke sath hun main

munafiqin-e-tasawwuf ki maut hun main 'ali'

har ek asil har ek be-riya ke sath hun main