agar meri jabin-e-shauq waqf-e-bandagi hoti

agar merī jabīn-e-shauq vaqf-e-bandagī hotī

to phir mahshūr un ke saath apnī zindagī hotī

jo tasvīr-e-ḳhyālī naqsh dil par ho ga.ī hotī

to apnī zaat meñ har-dam tirī jalva-garī hotī

razā-e-dost par qurbān jis kī har ḳhushī hotī

haqīqat meñ usī kī ġham se ḳhālī zindagī hotī

nigāh-e-mast-e-sāqī se jo mai-ḳhvāroñ ne pī hotī

yaqīnan hashr tak un ko na phir tishna-labī hotī

husūl-e-dard-o-ġham kī koshishoñ meñ gar kamī hotī

surūr-o-kaif kī lazzat kahāñ mujh ko milī hotī

mujhe vo bātoñ bātoñ meñ agar dīvāna kah dete

to dīvānoñ meñ merī mo'atabar dīvāngī hotī

tire mashq-e-sitam hī ne kisī qābil kiyā mujh ko

terā ehsān varna zindagī kis kaam kī hotī

tumhārā aa.ina ban kar jo dil pesh-e-nazar rahtā

tumhīñ tum jalva-gar hote na sūrat dūsrī hotī

tasavvur hī ke aalam meñ jo vo taklīf farmāte

to kyuuñ furqat-nasīboñ ke liye shab hijr kī hotī

agar terī tarah tablīġh kartā pīr-e-mai-ḳhāna

to duniyā-bhar meñ vaa.iz mai-kashī hī mai-kashī hotī

tumhārī be-niyāzī ko ġharaz kab hai magar merī

tamannā hai jabīn-e-shauq vaqf-e-bandagī hotī

hayāt-o-maut kā paiġhām detā har-nafas 'vāsil'

kabhī rū-posh vo hote kabhī jalva-garī hotī

jo ma.abūdān-e-bātil kī jahāñ meñ sarvarī hotī

muqābil haidarī ke past kyuuñ kar marhabī hotī

agar meri jabin-e-shauq waqf-e-bandagi hoti

to phir mahshur un ke sath apni zindagi hoti

jo taswir-e-KHyali naqsh dil par ho gai hoti

to apni zat mein har-dam teri jalwa-gari hoti

raza-e-dost par qurban jis ki har KHushi hoti

haqiqat mein usi ki gham se KHali zindagi hoti

nigah-e-mast-e-saqi se jo mai-KHwaron ne pi hoti

yaqinan hashr tak un ko na phir tishna-labi hoti

husul-e-dard-o-gham ki koshishon mein gar kami hoti

surur-o-kaif ki lazzat kahan mujh ko mili hoti

mujhe wo baaton baaton mein agar diwana kah dete

to diwanon mein meri mo'atabar diwangi hoti

tere mashq-e-sitam hi ne kisi qabil kiya mujh ko

tera ehsan warna zindagi kis kaam ki hoti

tumhaara aaina ban kar jo dil pesh-e-nazar rahta

tumhin tum jalwa-gar hote na surat dusri hoti

tasawwur hi ke aalam mein jo wo taklif farmate

to kyun furqat-nasibon ke liye shab hijr ki hoti

agar teri tarah tabligh karta pir-e-mai-KHana

to duniya-bhar mein waiz mai-kashi hi mai-kashi hoti

tumhaari be-niyazi ko gharaz kab hai magar meri

tamanna hai jabin-e-shauq waqf-e-bandagi hoti

hayat-o-maut ka paigham deta har-nafas 'wasil'

kabhi ru-posh wo hote kabhi jalwa-gari hoti

jo mabudan-e-baatil ki jahan mein sarwari hoti

muqabil haidari ke past kyun kar marhabi hoti