aib bhi tere hunar lagte hain

'aib bhī tere hunar lagte haiñ

terī furqat kā samar lagte haiñ

kal jo qadmoñ meñ bichhe jaate the

ab vo saa.e bhī shajar lagte haiñ

vo uḌe phirte haiñ hairat kyā hai

chiyuñTiyoñ ke bhī to par lagte haiñ

pī ga.iiñ kitne samundar sadiyāñ

ab bhī dariyā hī amar lagte haiñ

ek sūraj hī to gahnāyā hai

log kyuuñ ḳhāk-basar lagte haiñ

jal rahā hai koī gulshan shāyad

ashk āñkhoñ meñ sharar lagte haiñ

jām-e-jam the jo mire dost kabhī

hādsa hai ki ḳhabar lagte haiñ

ham jahāñ rahte haiñ vo dasht vo ghar

dasht lagte haiñ na ghar lagte haiñ

bā.is-e-rañj the ilzām kabhī

ab to ye raḳht-e-safar lagte haiñ

rāste band haiñ saare 'jauhar'

phir bhī vo rāhguzar lagte haiñ

'aib bhi tere hunar lagte hain

teri furqat ka samar lagte hain

kal jo qadmon mein bichhe jate the

ab wo sae bhi shajar lagte hain

wo uDe phirte hain hairat kya hai

chiyunTiyon ke bhi to par lagte hain

pi gain kitne samundar sadiyan

ab bhi dariya hi amar lagte hain

ek suraj hi to gahnaya hai

log kyun KHak-basar lagte hain

jal raha hai koi gulshan shayad

ashk aankhon mein sharar lagte hain

jam-e-jam the jo mere dost kabhi

hadsa hai ki KHabar lagte hain

hum jahan rahte hain wo dasht wo ghar

dasht lagte hain na ghar lagte hain

bais-e-ranj the ilzam kabhi

ab to ye raKHt-e-safar lagte hain

raste band hain sare 'jauhar'

phir bhi wo rahguzar lagte hain