aish hi aish hai na sab gham hai

aish hī aish hai na sab ġham hai

zindagī ik hasīn sañgam hai

jaam meñ hai jo mish.al-e-gul-rañg

terī āñkhoñ kā aks-e-mub.ham hai

ai ġham-e-dahr ke giraftāro

aish bhī sarnavisht-e-ādam hai

nok-e-mizhgāñ pe yaad kā aañsū

mausam-e-gul kī sard shabnam hai

dard-e-dil meñ kamī huī hai kahīñ

tum ne pūchhā to kah diyā kam hai

miTtī jaatī hai bantī jaatī hai

zindagī kā ajiib aalam hai

ik zarā muskurā ke bhī dekheñ

ġham to ye roz roz kā ġham hai

pūchhne vaale shukriya terā

dard to ab bhī hai magar kam hai

kah rahā thā maiñ apnā afsāna

kyuuñ tirā dāman-e-mizha nam hai

ġham kī tārīkiyoñ meñ ai 'zaidī'

raushnī vo bhī hai jo maddham hai

aish hi aish hai na sab gham hai

zindagi ek hasin sangam hai

jam mein hai jo mishal-e-gul-rang

teri aankhon ka aks-e-mubham hai

ai gham-e-dahr ke giraftaro

aish bhi sarnawisht-e-adam hai

nok-e-mizhgan pe yaad ka aansu

mausam-e-gul ki sard shabnam hai

dard-e-dil mein kami hui hai kahin

tum ne puchha to kah diya kam hai

miTti jati hai banti jati hai

zindagi ka ajib aalam hai

ek zara muskura ke bhi dekhen

gham to ye roz roz ka gham hai

puchhne wale shukriya tera

dard to ab bhi hai magar kam hai

kah raha tha main apna afsana

kyun tera daman-e-mizha nam hai

gham ki tarikiyon mein ai 'zaidi'

raushni wo bhi hai jo maddham hai