ajab pur-lutf manzar dekhta rahta hun barish mein

ajab pur-lutf manzar dekhtā rahtā huuñ bārish meñ

badan jaltā hai aur maiñ bhīgtā rahtā huuñ bārish meñ

sadā.eñ Duub jaatī haiñ havā ke shor meñ aur maiñ

galī-kūchoñ meñ tanhā chīḳhtā rahtā huuñ bārish meñ

darīche meñ dar aate haiñ bahut se mehrbāñ chehre

maiñ un par shoḳh jumle pheñktā rahtā huuñ bārish meñ

diye jalte haiñ, bujhte haiñ, mire atrāf meñ aur maiñ

bas ik saa.e ke pīchhe bhāgtā rahtā huuñ bārish meñ

pas-e-qaus-e-quzah ik sūrat-e-mahtāb kī jhilmil

maiñ is jhilmil ko pahroñ dekhtā rahtā huuñ bārish meñ

na sonā mere bas meñ hai, na shab bhar jāgnā 'ḳhālid'

maiñ āñkheñ kholtā aur mīchtā rahtā huuñ bārish meñ

ajab pur-lutf manzar dekhta rahta hun barish mein

badan jalta hai aur main bhigta rahta hun barish mein

sadaen Dub jati hain hawa ke shor mein aur main

gali-kuchon mein tanha chiKHta rahta hun barish mein

dariche mein dar aate hain bahut se mehrban chehre

main un par shoKH jumle phenkta rahta hun barish mein

diye jalte hain, bujhte hain, mere atraf mein aur main

bas ek sae ke pichhe bhagta rahta hun barish mein

pas-e-qaus-e-quzah ek surat-e-mahtab ki jhilmil

main is jhilmil ko pahron dekhta rahta hun barish mein

na sona mere bas mein hai, na shab bhar jagna 'KHalid'

main aankhen kholta aur michta rahta hun barish mein