ajal ki phunk mere kan mein sunai di

ajal kī phūñk mire kaan meñ sunā.ī dī

jab us ne shab ke thake diip ko rihā.ī dī

darūn-e-ḳhāk rahā kārvān-e-nik.hat-o-rañg

numū ne sabr kiyā āḳhirash duhā.ī dī

ulajh rahā thā abhī ḳhvāb kī fasīl se maiñ

ki nā-rasā.ī ne ik shab mujhe rasā.ī dī

havā kā safha-e-larzāñ banāne vaale ne

mizha kī nok pe ashkoñ kī raushnā.ī dī

phir ek shab ye huā ḳhvāb ke shajar se pare

hazār rañg kī āvāz ik dikhā.ī dī

ajiib Dhañg se taqsīm-e-kār kī us ne

so jis ko dil na diyā us ko dilrubā.ī dī

sanā usī kī jo muhtāj-e-harf-o-saut nahīñ

ki jis ne ashk ke lahje meñ nam-navā.ī dī

ajal ki phunk mere kan mein sunai di

jab us ne shab ke thake dip ko rihai di

darun-e-KHak raha karwan-e-nikhat-o-rang

numu ne sabr kiya aaKHirash duhai di

ulajh raha tha abhi KHwab ki fasil se main

ki na-rasai ne ek shab mujhe rasai di

hawa ka safha-e-larzan banane wale ne

mizha ki nok pe ashkon ki raushnai di

phir ek shab ye hua KHwab ke shajar se pare

hazar rang ki aawaz ek dikhai di

ajib Dhang se taqsim-e-kar ki us ne

so jis ko dil na diya us ko dilrubai di

sana usi ki jo muhtaj-e-harf-o-saut nahin

ki jis ne ashk ke lahje mein nam-nawai di