ajib kaifiyat aaKHir talak rahi dil ki

ajiib kaifiyat āḳhir talak rahī dil kī

farāz-e-dār meñ bhī justujū thī manzil kī

vo husn jis se milā hai mujhe shu.ūr-e-vafā

ḳhudā nahīñ thā to kyuuñ vahi-e-ishq nāzil kī

tarāshe kitne hī but āzarī ke fan ne magar

milī na ek bhī sūrat tire muqābil kī

ab āñkheñ band haiñ taaki koī samajh na sake

mirī nigāh meñ tasvīr hogī qātil kī

dimāġh diida o dil sab ne roknā chāhā

magar junūñ ne mirī har dalīl bātil kī

isī ko kahte haiñ sāhil pe rah ke tishna-labī

talāsh hai tirī mahfil meñ jān-e-mahfil kī

ye baat sach hai ki marnā sabhī ko hai lekin

alag hī hotī hai lazzat nigāh-e-qātil kī

thā rahbaroñ pe bharosa to ab bhaTaktā huuñ

mujhe ḳhabar hī nahīñ thī fareb-e-manzil kī

miyāñ 'shahīd' ye maanā ki tum bhī shā.er ho

magar batāo ki haq āgahī bhī hāsil kī

ajib kaifiyat aaKHir talak rahi dil ki

faraaz-e-dar mein bhi justuju thi manzil ki

wo husn jis se mila hai mujhe shuur-e-wafa

KHuda nahin tha to kyun wahi-e-ishq nazil ki

tarashe kitne hi but aazari ke fan ne magar

mili na ek bhi surat tere muqabil ki

ab aankhen band hain taki koi samajh na sake

meri nigah mein taswir hogi qatil ki

dimagh dida o dil sab ne rokna chaha

magar junun ne meri har dalil baatil ki

isi ko kahte hain sahil pe rah ke tishna-labi

talash hai teri mahfil mein jaan-e-mahfil ki

ye baat sach hai ki marna sabhi ko hai lekin

alag hi hoti hai lazzat nigah-e-qatil ki

tha rahbaron pe bharosa to ab bhaTakta hun

mujhe KHabar hi nahin thi fareb-e-manzil ki

miyan 'shahid' ye mana ki tum bhi shaer ho

magar batao ki haq aagahi bhi hasil ki