aks kitne utar gae mujh mein

aks kitne utar ga.e mujh meñ

phir na jaane kidhar ga.e mujh meñ

maiñ ne chāhā thā zaḳhm bhar jaa.eñ

zaḳhm hī zaḳhm bhar ga.e mujh meñ

maiñ vo pal thā jo khā gayā sadiyāñ

sab zamāne guzar ga.e mujh meñ

ye jo maiñ huuñ zarā sā baaqī huuñ

vo jo tum the vo mar ga.e mujh meñ

mere andar thī aisī tārīkī

aa ke aaseb Dar ga.e mujh meñ

pahle utrā maiñ dil ke dariyā meñ

phir samundar utar ga.e mujh meñ

kaisā mujh ko banā diyā 'ammār'

kaun sā rañg bhar ga.e mujh meñ

aks kitne utar gae mujh mein

phir na jaane kidhar gae mujh mein

main ne chaha tha zaKHm bhar jaen

zaKHm hi zaKHm bhar gae mujh mein

main wo pal tha jo kha gaya sadiyan

sab zamane guzar gae mujh mein

ye jo main hun zara sa baqi hun

wo jo tum the wo mar gae mujh mein

mere andar thi aisi tariki

aa ke aaseb Dar gae mujh mein

pahle utra main dil ke dariya mein

phir samundar utar gae mujh mein

kaisa mujh ko bana diya 'ammar'

kaun sa rang bhar gae mujh mein