andhere mein tajassus ka taqaza chhoD jaana hai

añdhere meñ tajassus kā taqāzā chhoḌ jaanā hai

kisī din ḳhāmushī meñ ḳhud ko tanhā chhoḌ jaanā hai

samundar hai magar vo chāhtā hai Dūbnā mujh meñ

mujhe bhī us kī ḳhātir ye kināra chhoḌ jaanā hai

bahut ḳhush huuñ maiñ sāhil par chamaktī sīpiyāñ chun kar

magar mujh ko to ik din ye ḳhazāna chhoḌ jaanā hai

tulū-e-sub.h kī aahaT se lashkar jaag jā.egā

chalā jaa.e abhī vo jis ko ḳhema chhoḌ jaanā hai

na jaane kab koī aa kar mirī takmīl kar jaa.e

isī ummīd pe ḳhud ko adhūrā chhoḌ jaanā hai

kahāñ tak ḳhaak kā paikar liye phirtā rahūñgā maiñ

use bārish ke mausam meñ nihattā chhoḌ jaanā hai

andhere mein tajassus ka taqaza chhoD jaana hai

kisi din KHamushi mein KHud ko tanha chhoD jaana hai

samundar hai magar wo chahta hai Dubna mujh mein

mujhe bhi us ki KHatir ye kinara chhoD jaana hai

bahut KHush hun main sahil par chamakti sipiyan chun kar

magar mujh ko to ek din ye KHazana chhoD jaana hai

tulu-e-subh ki aahaT se lashkar jag jaega

chala jae abhi wo jis ko KHema chhoD jaana hai

na jaane kab koi aa kar meri takmil kar jae

isi ummid pe KHud ko adhura chhoD jaana hai

kahan tak KHak ka paikar liye phirta rahunga main

use barish ke mausam mein nihatta chhoD jaana hai