andheron mein ujale kho rahe hain

añdheroñ meñ ujāle kho rahe haiñ

nagar ke diip maddham ho rahe haiñ

havā meñ uḌ rahī haiñ surḳh chīleñ

kabūtar ghoñsloñ meñ so rahe haiñ

bahar jānib ta'affun baḌh rahā hai

anokhī fasl dahqāñ bo rahe haiñ

'ajab armāñ hai tā'mīr-e-makāñ kā

ka.ī sadiyoñ se patthar Dho rahe haiñ

sar-e-koh-e-tamannā kaun pahuñche

purāne zaḳhm ab tak dho rahe haiñ

aTā hai shahr bārūdī dhueñ se

saḌak par chand bachche ro rahe haiñ

na paḌne dī anā par dhuul 'rāsiḳh'

sarāb-e-zar meñ barsoñ go rahe haiñ

andheron mein ujale kho rahe hain

nagar ke dip maddham ho rahe hain

hawa mein uD rahi hain surKH chilen

kabutar ghonslon mein so rahe hain

bahar jaanib ta'affun baDh raha hai

anokhi fasl dahqan bo rahe hain

'ajab arman hai ta'mir-e-makan ka

kai sadiyon se patthar Dho rahe hain

sar-e-koh-e-tamanna kaun pahunche

purane zaKHm ab tak dho rahe hain

aTa hai shahr barudi dhuen se

saDak par chand bachche ro rahe hain

na paDne di ana par dhul 'rasiKH'

sarab-e-zar mein barson go rahe hain