anjam ye hua hai dil-e-be-qarar ka

anjām ye huā hai dil-e-be-qarār kā

thamtā nahīñ hai paañv hamāre ġhubār kā

pahle kiyā ḳhayāl na gul kā na ḳhaar kā

ab dukh rahā hai paañv nasīm-e-bahār kā

paiham diye vo ranj ki insāñ banā diyā

minnat-pazīr huuñ sitam-e-rozgār kā

us ko ḳhizāñ ke aane kā kyā ranj kyā qalaq

rote kaTā ho jis ko zamāna bahār kā

maḳhfī hai is meñ rāz-e-baqā-e-hayāt-e-ishq

kyā pūchhte ho haal dil-e-be-qarār kā

majbūriyāñ sitam haiñ vagarna ḳhudā kī shaan

maiñ aur yuuñ guzār duuñ mausam bahār kā

ġhāfil nigah-e-hosh se rañg-e-chaman ko dekh

parvurda-e-ḳhizāñ hai zamāna bahār kā

niklā hai dam 'ravāñ' kā tamannā ke saath saath

allāh-re zor nāla-e-be-iḳhteyār kā

anjam ye hua hai dil-e-be-qarar ka

thamta nahin hai panw hamare ghubar ka

pahle kiya KHayal na gul ka na KHar ka

ab dukh raha hai panw nasim-e-bahaar ka

paiham diye wo ranj ki insan bana diya

minnat-pazir hun sitam-e-rozgar ka

us ko KHizan ke aane ka kya ranj kya qalaq

rote kaTa ho jis ko zamana bahaar ka

maKHfi hai is mein raaz-e-baqa-e-hayat-e-ishq

kya puchhte ho haal dil-e-be-qarar ka

majburiyan sitam hain wagarna KHuda ki shan

main aur yun guzar dun mausam bahaar ka

ghafil nigah-e-hosh se rang-e-chaman ko dekh

parwurda-e-KHizan hai zamana bahaar ka

nikla hai dam 'rawan' ka tamanna ke sath sath

allah-re zor nala-e-be-iKHteyar ka