apni hasti ka agar husn numayan ho jae

apnī hastī kā agar husn numāyāñ ho jaa.e

aadmī kasrat-e-anvār se hairāñ ho jaa.e

tum jo chāho to mire dard kā darmāñ ho jaa.e

varna mushkil hai ki mushkil mirī āsāñ ho jaa.e

o namak-pāsh tujhe apnī malāhat kī qasam

baat to jab hai ki har zaḳhm namakdāñ ho jaa.e

dene vaale tujhe denā hai to itnā de de

ki mujhe shikva-e-kotāhī-e-dāmāñ ho jaa.e

us siyah-baḳht kī rāteñ bhī koī rāteñ haiñ

ḳhvāb-e-rāhat bhī jise ḳhvāb-e-pareshāñ ho jaa.e

sīna-e-shiblī-o-mansūr to phūñkā tū ne

is taraf bhī karam ai jumbish-e-dāmāñ ho jaa.e

āḳhirī saañs bane zamzam-e-hū apnā

sāz-e-mizrāb-e-fanā tār-e-rag-e-jāñ ho jaa.e

tū jo asrār-e-haqīqat kahīñ zāhir kar de

abhī 'bedam' rasan-o-dār kā sāmāñ ho jaa.e

apni hasti ka agar husn numayan ho jae

aadmi kasrat-e-anwar se hairan ho jae

tum jo chaho to mere dard ka darman ho jae

warna mushkil hai ki mushkil meri aasan ho jae

o namak-pash tujhe apni malahat ki qasam

baat to jab hai ki har zaKHm namakdan ho jae

dene wale tujhe dena hai to itna de de

ki mujhe shikwa-e-kotahi-e-daman ho jae

us siyah-baKHt ki raaten bhi koi raaten hain

KHwab-e-rahat bhi jise KHwab-e-pareshan ho jae

sina-e-shibli-o-mansur to phunka tu ne

is taraf bhi karam ai jumbish-e-daman ho jae

aaKHiri sans bane zamzam-e-hu apna

saz-e-mizrab-e-fana tar-e-rag-e-jaan ho jae

tu jo asrar-e-haqiqat kahin zahir kar de

abhi 'bedam' rasan-o-dar ka saman ho jae