apni majburi ko hum diwar-o-dar kahne lage

apnī majbūrī ko ham dīvār-o-dar kahne lage

qaid kā sāmāñ kiyā aur us ko ghar kahne lage

darj hai tārīḳh-e-vasl-o-hijr ik ik shāḳh par

baat jo ham tum na kah paa.e shajar kahne lage

ḳhauf-e-tanhā.ī dikhātā thā ajab shakleñ so ham

apne saa.e hī ko apnā ham-safar kahne lage

bastiyoñ ko bāñTne vaalā jo ḳhat khīñchā gayā

ḳhat kashīda log us ko rah-guzar kahne lage

avval avval dostoñ par naaz thā kyā kyā hameñ

āḳhir āḳhir dushmanoñ ko mo'tabar kahne lage

dekhte haiñ ghar ke rauzan se jo niilā āsmāñ

vo bhī apne aap ko ahl-e-nazar kahne lage

apni majburi ko hum diwar-o-dar kahne lage

qaid ka saman kiya aur us ko ghar kahne lage

darj hai tariKH-e-wasl-o-hijr ek ek shaKH par

baat jo hum tum na kah pae shajar kahne lage

KHauf-e-tanhai dikhata tha ajab shaklen so hum

apne sae hi ko apna ham-safar kahne lage

bastiyon ko banTne wala jo KHat khincha gaya

KHat kashida log us ko rah-guzar kahne lage

awwal awwal doston par naz tha kya kya hamein

aaKHir aaKHir dushmanon ko mo'tabar kahne lage

dekhte hain ghar ke rauzan se jo nila aasman

wo bhi apne aap ko ahl-e-nazar kahne lage