apni tanhai ka saman uTha lae hain

apnī tanhā.ī kā sāmān uThā laa.e haiñ

aaj ham 'mīr' kā dīvān uThā laa.e haiñ

in dinoñ apnī bhī vahshat kā ajab aalam hai

ghar meñ ham dasht-o-bayābān uThā laa.e haiñ

vus.at-e-halqa-e-zanjīr kī āvāz ke saath

ham vo qaidī haiñ ki zindān uThā laa.e haiñ

mere sāñsoñ meñ koī gholtā rahtā hai alaav

apne siine meñ vo tūfān uThā laa.e haiñ

ik na.e tarz pe ābād kareñge us ko

ham tire shahr kī pahchān uThā laa.e haiñ

zindagī ḳhud se mukarne nahīñ deñge tujh ko

apne hone ke sab imkān uThā laa.e haiñ

ham ne nuqsān meñ imkān ko rakkhā hī nahīñ

jitne mumkin the vo nuqsān uThā laa.e haiñ

kuchh to 'shāhid' ko bhī nisbat rahī hogī us se

vo jo TuuTā huā gul-dān uThā laa.e haiñ

apni tanhai ka saman uTha lae hain

aaj hum 'mir' ka diwan uTha lae hain

in dinon apni bhi wahshat ka ajab aalam hai

ghar mein hum dasht-o-bayaban uTha lae hain

wusat-e-halqa-e-zanjir ki aawaz ke sath

hum wo qaidi hain ki zindan uTha lae hain

mere sanson mein koi gholta rahta hai alaw

apne sine mein wo tufan uTha lae hain

ek nae tarz pe aabaad karenge us ko

hum tere shahr ki pahchan uTha lae hain

zindagi KHud se mukarne nahin denge tujh ko

apne hone ke sab imkan uTha lae hain

hum ne nuqsan mein imkan ko rakkha hi nahin

jitne mumkin the wo nuqsan uTha lae hain

kuchh to 'shahid' ko bhi nisbat rahi hogi us se

wo jo TuTa hua gul-dan uTha lae hain