asnam-e-mal-o-zar ki parastish sikha gai

asnām-e-māl-o-zar kī parastish sikhā ga.ī

duniyā mujhe bhī ābid-e-duniyā banā ga.ī

vo sañg-e-dil mazār-e-vafā par ba-nām-e-ishq

aa.ī to mere naam kā patthar lagā ga.ī

mere liye hazār tabassum thī vo bahār

jo āñsuoñ kī raah pe mujh ko lagā ga.ī

gauhar-farosh shabnamī palkoñ kī chhāñv meñ

kyā aag thī jo ruuh ke andar samā ga.ī

mere suḳhan kī daad bhī us ko hī dījiye

vo jis kī aarzū mujhe shā.ir banā ga.ī

'sahbā' vo raushnī jo bahut mehrbān thī

kyuuñ mere rāste meñ añdhere bichhā ga.ī

asnam-e-mal-o-zar ki parastish sikha gai

duniya mujhe bhi aabid-e-duniya bana gai

wo sang-e-dil mazar-e-wafa par ba-nam-e-ishq

aai to mere nam ka patthar laga gai

mere liye hazar tabassum thi wo bahaar

jo aansuon ki rah pe mujh ko laga gai

gauhar-farosh shabnami palkon ki chhanw mein

kya aag thi jo ruh ke andar sama gai

mere suKHan ki dad bhi us ko hi dijiye

wo jis ki aarzu mujhe shair bana gai

'sahba' wo raushni jo bahut mehrban thi

kyun mere raste mein andhere bichha gai