ata-e-gham pe bhi KHush hun meri KHushi kya hai

atā-e-ġham pe bhī ḳhush huuñ mirī ḳhushī kyā hai

razā talab jo nahīñ hai vo bandagī kyā hai

tirī nigāh kī naqqāshi-e-hasīñ ke sivā

tū hī batā mirā mafhūm-e-zindagī kyā hai

sitam-shi.ār jafā-āshnā vafā-dushman

ye nañg-e-azmat-e-ādam hai aadmī kyā hai

tirā tasavvur-e-rañgīñ agar na ho shāmil

bahār-e-gulshan-e-imkāñ meñ dilkashī kyā hai

zamāna aap kā kahtā hai jis ko aks-e-jamīl

nazar uThā ke to dekho ye chāndnī kyā hai

tamām umr qafas meñ guzār dī ham ne

ḳhabar nahīñ ki nasheman kī zindagī kyā hai

ata-e-gham pe bhi KHush hun meri KHushi kya hai

raza talab jo nahin hai wo bandagi kya hai

teri nigah ki naqqashi-e-hasin ke siwa

tu hi bata mera mafhum-e-zindagi kya hai

sitam-shiar jafa-ashna wafa-dushman

ye nang-e-azmat-e-adam hai aadmi kya hai

tera tasawwur-e-rangin agar na ho shamil

bahaar-e-gulshan-e-imkan mein dilkashi kya hai

zamana aap ka kahta hai jis ko aks-e-jamil

nazar uTha ke to dekho ye chandni kya hai

tamam umr qafas mein guzar di hum ne

KHabar nahin ki nasheman ki zindagi kya hai