baadal hai aur phul khile hain sabhi taraf

bādal hai aur phuul khile haiñ sabhī taraf

kahtā hai dil ki aaj nikal jā kisī taraf

tevar bahut ḳharāb the sunte haiñ kal tire

achchhā huā ki ham ne na dekhā tirī taraf

jab bhī mile ham un se unhoñ ne yahī kahā

bas aaj aane vaale the ham aap kī taraf

ai dil ye dhaḌkaneñ tirī ma.amūl kī nahīñ

lagtā hai aa rahā hai vo fitna isī taraf

ḳhush thā ki chaar nekiyāñ haiñ jam.a us ke paas

nikle gunāh bīsiyoñ ulTā mirī taraf

'bāsir' adū se ham to yūñhī bad-gumāñ rahe

thā un kā iltifāt kisī aur hī taraf

baadal hai aur phul khile hain sabhi taraf

kahta hai dil ki aaj nikal ja kisi taraf

tewar bahut KHarab the sunte hain kal tere

achchha hua ki hum ne na dekha teri taraf

jab bhi mile hum un se unhon ne yahi kaha

bas aaj aane wale the hum aap ki taraf

ai dil ye dhaDkanen teri mamul ki nahin

lagta hai aa raha hai wo fitna isi taraf

KHush tha ki chaar nekiyan hain jama us ke pas

nikle gunah bisiyon ulTa meri taraf

'basir' adu se hum to yunhi bad-guman rahe

tha un ka iltifat kisi aur hi taraf