باتوں کے نگر سے آ رہے ہیں

باتوں کے نگر سے آ رہے ہیں

ہم اپنے ہی گھر سے آ رہے ہیں

لفظوں کے طلوع کر کے آفاق

معنی کے سفر سے آ رہے ہیں

خاموشیاں بھر کے تن بدن میں

ہم برق و شرر سے آ رہے ہیں

تاروں کے یہ جتنے قافلے ہیں

امکان سحر سے آ رہے ہیں

ان اشکوں کا دل سے کیا تعلق

یہ شعلے جگر سے آ رہے ہیں

بھیگے ہوئے غم میں سر سے پا تک

دریائے ہنر سے آ رہے ہیں

جتنے بھی ہیں لطف جاں کے موسم

سب دیدۂ تر سے آ رہے ہیں

یہ غم کے طیور بے تحاشا

اک دل کے شجر سے آ رہے ہیں

مشکورؔ ہیں کس خیال میں مست

بے خوف و خطر سے آ رہے ہیں