badan-sarab na dariya-e-jaan se milta hai

badan-sarāb na dariyā-e-jāñ se miltā hai

to phir ye ḳhvāb-kināra kahāñ se miltā hai

ye dhuup chhāñv salāmat rahe ki terā surāġh

hameñ to sāya-e-abr-e-ravāñ se miltā hai

ham ahl-e-dard jahāñ bhī haiñ silsila sab kā

tumhāre shahr ke āshuftagāñ se miltā hai

jahāñ se kuchh na mile to bhī fā.ede haiñ bahut

hameñ ye naqd usī āstāñ se miltā hai

fazā hī saarī huī surḳh-rū to hairat kyā

ki aaj rañg-e-havā gul-ruḳhāñ se miltā hai

bichhaḌ ke ḳhaak hue ham to kyā zarā dekho

ġhubār jā ke usī kārvāñ se miltā hai

badan-sarab na dariya-e-jaan se milta hai

to phir ye KHwab-kinara kahan se milta hai

ye dhup chhanw salamat rahe ki tera suragh

hamein to saya-e-abr-e-rawan se milta hai

hum ahl-e-dard jahan bhi hain silsila sab ka

tumhaare shahr ke aashuftagan se milta hai

jahan se kuchh na mile to bhi faede hain bahut

hamein ye naqd usi aastan se milta hai

faza hi sari hui surKH-ru to hairat kya

ki aaj rang-e-hawa gul-ruKHan se milta hai

bichhaD ke KHak hue hum to kya zara dekho

ghubar ja ke usi karwan se milta hai