baDi ibrat ki manzil hai zamin gor-e-ghariban ki

baḌī ibrat kī manzil hai zamīñ gor-e-ġharībāñ kī

yahāñ apnī haqīqat par nazar paḌtī hai insāñ kī

yahī dhun thī kahīñ merā dil-e-gum-gashta mil jaa.e

isī vahshat meñ barsoñ ḳhaak chhānī kū-e-jānāñ kī

jahāñ nabzeñ rukīñ dil sard ho do hichkiyāñ aa.iiñ

samajh liije ki manzil aa ga.ī gor-e-ġharībāñ kī

na jā.egā mere dil se ḳhayāl-e-abrū-e-dil-bar

ki teġhoñ hī ke saa.e meñ to hai jannat musalmāñ kī

fanā-e-ishq ho kar zinda-e-jāved hotā hai

miTā kar dekhiye hastī nahīñ miTtī hai insāñ kī

yahāñ rone se ho maqsūd hāsil ġhair-mumkin hai

chalo ab sham.eñ bhī bujhne lagīñ gor-e-ġharībāñ kī

'safīr' ik ḳhvāb thī ye chand roza zindagī apnī

ajal se mil ga.ī ta.abīr is ḳhvāb-e-pareshāñ kī

baDi ibrat ki manzil hai zamin gor-e-ghariban ki

yahan apni haqiqat par nazar paDti hai insan ki

yahi dhun thi kahin mera dil-e-gum-gashta mil jae

isi wahshat mein barson KHak chhani ku-e-jaanan ki

jahan nabzen rukin dil sard ho do hichkiyan aain

samajh lije ki manzil aa gai gor-e-ghariban ki

na jaega mere dil se KHayal-e-abru-e-dil-bar

ki teghon hi ke sae mein to hai jannat musalman ki

fana-e-ishq ho kar zinda-e-jawed hota hai

miTa kar dekhiye hasti nahin miTti hai insan ki

yahan rone se ho maqsud hasil ghair-mumkin hai

chalo ab shamen bhi bujhne lagin gor-e-ghariban ki

'safir' ek KHwab thi ye chand roza zindagi apni

ajal se mil gai tabir is KHwab-e-pareshan ki