bahut kam haisiyat mein naqd-e-jaan hai

bahut kam haisiyat meñ naqd-e-jāñ hai

ḳhudā kī raah kā saudā girāñ hai

chhurī hai tiir hai teġh-o-sināñ hai

ye kis bekas kā āḳhir imtihāñ hai

talātum-ḳhez ye bahr-e-jahāñ hai

bhañvar meñ kashtī-e-umr-e-ravāñ hai

adā ho shukr kis kis kā ḳhudāyā

hazāroñ ne.amateñ haiñ ik zabāñ hai

tirā kūcha bahut achchhā hai lekin

mire rahne kī gunjā.ish kahāñ hai

azal kyā thā faqat ik vaqt-e-ta.alīm

abad kyā shai hai vaqt-e-imtihāñ hai

tirī sūrat hai dil ke aa.ine meñ

tirā hī naam ab vird-e-zabāñ hai

nahīñ duniyā maqām-e-aish-o-rāhat

jise dekho vo masrūf-e-fuġhāñ hai

ajal se sāmnā hotā hai ik din

ḳhizar bekār umr-e-jāvedāñ hai

uThātī hai sitam har bāġhbāñ ke

vo ik bulbul jo musht-e-ustuḳhvāñ hai

nahīñ duniyā ko istihkām hargiz

yahāñ 'mas.ūd' kyoñ fikr-e-makāñ hai

bahut kam haisiyat mein naqd-e-jaan hai

KHuda ki rah ka sauda giran hai

chhuri hai tir hai tegh-o-sinan hai

ye kis bekas ka aaKHir imtihan hai

talatum-KHez ye bahr-e-jahan hai

bhanwar mein kashti-e-umr-e-rawan hai

ada ho shukr kis kis ka KHudaya

hazaron neamaten hain ek zaban hai

tera kucha bahut achchha hai lekin

mere rahne ki gunjaish kahan hai

azal kya tha faqat ek waqt-e-talim

abad kya shai hai waqt-e-imtihan hai

teri surat hai dil ke aaine mein

tera hi nam ab wird-e-zaban hai

nahin duniya maqam-e-aish-o-rahat

jise dekho wo masruf-e-fughan hai

ajal se samna hota hai ek din

KHizar bekar umr-e-jawedan hai

uThati hai sitam har baghban ke

wo ek bulbul jo musht-e-ustuKHwan hai

nahin duniya ko istihkaam hargiz

yahan 'masud' kyon fikr-e-makan hai