bahut nahif hai tarz-e-fughan badal Dalo

bahut nahīf hai tarz-e-fuġhāñ badal Daalo

nizām-e-dahr ko naġhma-girāñ badal Daalo

dil-girafta tanavvo hai zindagī kā usuul

makāñ kā zikr to kyā lā-makāñ badal Daalo

na koī chiiz davāmī na koī shai mahfūz

yaqīñ sañbhāl ke rakkho gumāñ badal Daalo

nayā banāyā hai dastūr-e-āshiqī ham ne

jo tum bhī qā.eda-e-dil-barāñ badal Daalo

agar ye taḳhta-e-gul zahr hai nazar ke liye

to phir mulāzamat-e-gulsitāñ badal Daalo

jo ek pal ke liye ḳhud badal nahīñ sakte

ye kah rahe haiñ ki saarā jahāñ badal Daalo

tumhārā kyā hai musībat hai likhne vāloñ kī

jo de chuke ho vo saare bayāñ badal Daalo

mujhe batāyā hai 'sayyad' ne nusḳha-e-āsāñ

jo tañg ho to zamīñ āsmāñ badal Daalo

bahut nahif hai tarz-e-fughan badal Dalo

nizam-e-dahr ko naghma-giran badal Dalo

dil-girafta tanawwo hai zindagi ka usul

makan ka zikr to kya la-makan badal Dalo

na koi chiz dawami na koi shai mahfuz

yaqin sanbhaal ke rakkho guman badal Dalo

naya banaya hai dastur-e-ashiqi hum ne

jo tum bhi qaeda-e-dil-baran badal Dalo

agar ye taKHta-e-gul zahr hai nazar ke liye

to phir mulazamat-e-gulsitan badal Dalo

jo ek pal ke liye KHud badal nahin sakte

ye kah rahe hain ki sara jahan badal Dalo

tumhaara kya hai musibat hai likhne walon ki

jo de chuke ho wo sare bayan badal Dalo

mujhe bataya hai 'sayyad' ne nusKHa-e-asan

jo tang ho to zamin aasman badal Dalo