bahut shiddat se jo qaem hua tha

bahut shiddat se jo qaa.em huā thā

vo rishta ham meñ shāyad jhuuT kā thā

mohabbat ne akelā kar diyā hai

maiñ apnī zaat meñ ik qāfila thā

mirī āñkhoñ meñ bārish kī ghuTan thī

tumhāre paañv bādal chūmtā thā

tumhārī hī galī kā vāqi.a hai

maiñ pahlī baar jab tanhā huā thā

khujūroñ ke daraḳhtoñ se bhī ūñchā

mire dil meñ tumhārā martaba thā

mohabbat is liye bhī kī ga.ī thī

hamārā sher kahnā mas.ala thā

mujhe ik phuul ne samjhā.ī duniyā

jo tere sabz bāġhoñ meñ khilā thā

zuhūr-e-ādam-o-havvā se pahle

hamāre vāste sab kuchh nayā thā

zamīñ par jab zamīnī mas.ale the

to bārish bhī mukammal vāqi.a thā

qadam uThne meñ kitnī barkateñ thiiñ

aur un hāthoñ meñ kaisā zā.iqa thā

phir is ke ba.ad raste mar ga.e the

maiñ bas ik saañs lene ko rukā thā

bahut shiddat se jo qaem hua tha

wo rishta hum mein shayad jhuT ka tha

mohabbat ne akela kar diya hai

main apni zat mein ek qafila tha

meri aankhon mein barish ki ghuTan thi

tumhaare panw baadal chumta tha

tumhaari hi gali ka waqia hai

main pahli bar jab tanha hua tha

khujuron ke daraKHton se bhi uncha

mere dil mein tumhaara martaba tha

mohabbat is liye bhi ki gai thi

hamara sher kahna masala tha

mujhe ek phul ne samjhai duniya

jo tere sabz baghon mein khila tha

zuhur-e-adam-o-hawwa se pahle

hamare waste sab kuchh naya tha

zamin par jab zamini masale the

to barish bhi mukammal waqia tha

qadam uThne mein kitni barkaten thin

aur un hathon mein kaisa zaiqa tha

phir is ke baad raste mar gae the

main bas ek sans lene ko ruka tha