bala ki dhup thi sari faza dahakti rahi

balā kī dhuup thī saarī fazā dahaktī rahī

magar vafā kī kalī shāḳh par chaTaktī rahī

bichhaḌte vaqt meñ us ko dilāsa detā rahā

vo be-zabāñ thī mujhe bebasī se taktī rahī

use ḳhabar thī ki ham ahl-e-dasht pyāse haiñ

jabhī to mauj kināroñ se sar paTaktī rahī

alam-nasīb to ro ro ke so ga.e āḳhir

magar malūl huā raat bhar sisaktī rahī

dam-e-judā.ī vo maryam salīb kī mānind

mire gale se baḌī der tak laTaktī rahī

maiñ aisī raah pe niklā ki merī ḳhush-baḳhtī

tamām umr mirī khoj meñ bhaTaktī rahī

bala ki dhup thi sari faza dahakti rahi

magar wafa ki kali shaKH par chaTakti rahi

bichhaDte waqt mein us ko dilasa deta raha

wo be-zaban thi mujhe bebasi se takti rahi

use KHabar thi ki hum ahl-e-dasht pyase hain

jabhi to mauj kinaron se sar paTakti rahi

alam-nasib to ro ro ke so gae aaKHir

magar malul hua raat bhar sisakti rahi

dam-e-judai wo maryam salib ki manind

mere gale se baDi der tak laTakti rahi

main aisi rah pe nikla ki meri KHush-baKHti

tamam umr meri khoj mein bhaTakti rahi