barson teri talab mein safina rawan raha

barsoñ tirī talab meñ safīna ravāñ rahā

ai mere mehrbān bhañvar tū kahāñ rahā

un se milī nazar to palaT kar na aa sakī

vo rishta-e-nigāh bhī kab darmiyāñ rahā

kab umr-e-ḳhizr ḳhanda-e-gul kā javāb hai

yaañ do ghaḌī meñ umr-e-abad kā samāñ rahā

maiñ bhī tire baġhair na ārām pā sakā

tū bhī mirī talāsh meñ be-ḳhānamāñ rahā

mujh ko gila hai tab-e-muravvat-shi.ār se

sāġhar-ba-dast ho ke bhī tishna vahāñ rahā

ai daur-e-charḳh ab koī tadbīr aur kar

terī sitamgarī pe to maiñ shādmāñ rahā

mujh ko 'jalīl' kaun kahegā shikasta-dil

khāyā thā ek zaḳhm so vo be-nishāñ rahā

barson teri talab mein safina rawan raha

ai mere mehrban bhanwar tu kahan raha

un se mili nazar to palaT kar na aa saki

wo rishta-e-nigah bhi kab darmiyan raha

kab umr-e-KHizr KHanda-e-gul ka jawab hai

yan do ghaDi mein umr-e-abad ka saman raha

main bhi tere baghair na aaram pa saka

tu bhi meri talash mein be-KHanaman raha

mujh ko gila hai tab-e-murawwat-shiar se

saghar-ba-dast ho ke bhi tishna wahan raha

ai daur-e-charKH ab koi tadbir aur kar

teri sitamgari pe to main shadman raha

mujh ko 'jalil' kaun kahega shikasta-dil

khaya tha ek zaKHm so wo be-nishan raha