be-faiz ajab nikli ye fasl-e-tamanna bhi

be-faiz ajab niklī ye fasl-e-tamannā bhī

phūTī nahīñ koñpal bhī chaTkā nahīñ ġhuncha bhī

kyā ho gayā gulshan ko sākit hai fazā kaisī

sab shāḳh o shajar chup haiñ hiltā nahīñ pattā bhī

lau jis se lagā.ī thī vo aas bhī maddham hai

dil jis se charāġhāñ thā bujhtā hai vo sho.ala bhī

is ishq meñ kyā khoyā is dard se kyā paayā

tum ne nahīñ pūchhā bhī ham ne nahīñ sochā bhī

āñgan hī meñ ab dil ke ham ḳhaak uḌāte haiñ

ghar hī meñ nikal aa.ī gunjā.ish-e-sahrā bhī

andhoñ ke liye ro.uuñ bahroñ ke liye gā.ūñ

hai zauq-e-navā mujh ko lekin nahīñ itnā bhī

be-faiz ajab nikli ye fasl-e-tamanna bhi

phuTi nahin konpal bhi chaTka nahin ghuncha bhi

kya ho gaya gulshan ko sakit hai faza kaisi

sab shaKH o shajar chup hain hilta nahin patta bhi

lau jis se lagai thi wo aas bhi maddham hai

dil jis se charaghan tha bujhta hai wo shoala bhi

is ishq mein kya khoya is dard se kya paya

tum ne nahin puchha bhi hum ne nahin socha bhi

aangan hi mein ab dil ke hum KHak uDate hain

ghar hi mein nikal aai gunjaish-e-sahra bhi

andhon ke liye roun bahron ke liye gaun

hai zauq-e-nawa mujh ko lekin nahin itna bhi