bich dilon mein utra to hai

biich diloñ meñ utrā to hai

dard tirā albelā to hai

ruup tirā ai rāj-kumārī

jaise merī rachnā to hai

chāñd ko tum āvāz to de lo

ek musāfir tanhā to hai

srījan-hārā srījan-hārā

tujh bin bālak bilkā to hai

sirr-e-ālam kuchh kuchh ham ne

sochā to hai jaanā to hai

kitnī sub.heñ barham hoñgī

sho.ala imshab bhaḌkā to hai

kahne vaale kahtā jā tū

sunñe vaalā suntā to hai

muzd kabhī barbād na hogī

nazd-o-dūr ye charchā to hai

marg ko yuuñ be-nām na samjho

ek taḳhayyul ujlā to hai

sub.h-e-ishq akelī kab hai

shām-e-ġham kā pahrā to hai

maggham maggham pinhāñ pinhāñ

baat kā afsūñ gahrā to hai

ḳhvāb sahī gar naqsh-e-ālam

insāñ aatā jaatā to hai

khoj meñ us kī barsoñ phir ke

chāñd-nagar pahchānā to hai

raste baste baaġh meñ yaaro

marg kā har-dam khaTkā to hai

terā 'azīm' ai jān-e-ālam

'mīr' kī lai meñ gaatā to hai

bich dilon mein utra to hai

dard tera albela to hai

rup tera ai raj-kumari

jaise meri rachna to hai

chand ko tum aawaz to de lo

ek musafir tanha to hai

srijan-haara srijan-haara

tujh bin baalak bilka to hai

sirr-e-alam kuchh kuchh hum ne

socha to hai jaana to hai

kitni subhen barham hongi

shoala imshab bhaDka to hai

kahne wale kahta ja tu

sunne wala sunta to hai

muzd kabhi barbaad na hogi

nazd-o-dur ye charcha to hai

marg ko yun be-nam na samjho

ek taKHayyul ujla to hai

subh-e-ishq akeli kab hai

sham-e-gham ka pahra to hai

maggham maggham pinhan pinhan

baat ka afsun gahra to hai

KHwab sahi gar naqsh-e-alam

insan aata jata to hai

khoj mein us ki barson phir ke

chand-nagar pahchana to hai

raste baste bagh mein yaro

marg ka har-dam khaTka to hai

tera 'azim' ai jaan-e-alam

'mir' ki lai mein gata to hai