bujhti ragon mein nur bikharta hua sa main

bujhtī ragoñ meñ nuur bikhartā huā sā maiñ

tūfān-e-nañg-e-mauj guzartā huā sā maiñ

har shab ujāltī huī bhīgī rutoñ ke ḳhvāb

aur misl-e-aks-e-ḳhvāb bikhartā huā sā maiñ

mauj-e-talab meñ tair gayā thā bas ek naam

phir yuuñ huā ki jī uThā martā huā sā maiñ

ik dhund sī falak se utartī dikhā.ī de

phir us meñ aks aks sañvartā huā sā maiñ

dast-e-duā uThā to uThā us ke hī huzūr

lekin ye kyā usī se mukartā huā sā maiñ

ab ke havā chale to bikhar jā.ūñ duur tak

lekin tirī galī meñ Thahartā huā sā maiñ

maiñ bujh gayā to kaun ujālegā terā ruup

zinda huuñ is ḳhayāl meñ martā huā sā maiñ

'ajmal' vo nīm-shab kī duā.eñ kahāñ ga.iiñ

ik shor-e-āgahī hai bikhartā huā sā maiñ

bujhti ragon mein nur bikharta hua sa main

tufan-e-nang-e-mauj guzarta hua sa main

har shab ujalti hui bhigi ruton ke KHwab

aur misl-e-aks-e-KHwab bikharta hua sa main

mauj-e-talab mein tair gaya tha bas ek nam

phir yun hua ki ji uTha marta hua sa main

ek dhund si falak se utarti dikhai de

phir us mein aks aks sanwarta hua sa main

dast-e-dua uTha to uTha us ke hi huzur

lekin ye kya usi se mukarta hua sa main

ab ke hawa chale to bikhar jaun dur tak

lekin teri gali mein Thaharta hua sa main

main bujh gaya to kaun ujalega tera rup

zinda hun is KHayal mein marta hua sa main

'ajmal' wo nim-shab ki duaen kahan gain

ek shor-e-agahi hai bikharta hua sa main