chaman mein barq kabhi aashiyan se dur nahin

chaman meñ barq kabhī āshiyāñ se duur nahīñ

zamīñ pe ham haiñ magar āsmāñ se duur nahīñ

jagā sako to jagāo ki nāḳhudā dekhe

tavāf-e-mauj-e-balā bādbāñ se duur nahīñ

ye ālam-e-basharīyat bikharne vaalā hai

koī makān bhī ab lā-makāñ se duur nahīñ

qarīb aa na sakā maiñ tire magar ḳhush huuñ

ki merā zikr tirī dāstāñ se duur nahīñ

zarā sī aur mahārat ho tīr-zan ko atā

nishāna ab mire dil ke nishāñ se duur nahīñ

ye hai davām kī manzil ki hai fanā kā khanDar

ye raaz aaj mire raḳhsh-e-jāñ se duur nahīñ

maiñ apne dil kā fasāna likhūñ to kyuuñ na likhūñ

ki qissa-goī meñ maiñ 'mopasāñ' se duur nahīñ

na kar ai tishna mudārāt meñ takalluf kuchh

ki ghar kā haal tire mehmāñ se duur nahīñ

chaman mein barq kabhi aashiyan se dur nahin

zamin pe hum hain magar aasman se dur nahin

jaga sako to jagao ki naKHuda dekhe

tawaf-e-mauj-e-bala baadban se dur nahin

ye aalam-e-bashariyat bikharne wala hai

koi makan bhi ab la-makan se dur nahin

qarib aa na saka main tere magar KHush hun

ki mera zikr teri dastan se dur nahin

zara si aur mahaarat ho tir-zan ko ata

nishana ab mere dil ke nishan se dur nahin

ye hai dawam ki manzil ki hai fana ka khanDar

ye raaz aaj mere raKHsh-e-jaan se dur nahin

main apne dil ka fasana likhun to kyun na likhun

ki qissa-goi mein main 'mopasan' se dur nahin

na kar ai tishna mudaraat mein takalluf kuchh

ki ghar ka haal tere mehman se dur nahin