chand lamhon ko sahi tha sath mein rahna bahut

chand lamhoñ ko sahī thā saath meñ rahnā bahut

ek bas tere na hone se hai sannāTā bahut

zabt kā sūraj bhī āḳhir shaam ko Dhal hī gayā

ġham kā bādal ban ke aañsū raat bhar barsā bahut

dushmanoñ ko koī bhī mauqā na milne pā.egā

dostoñ ne hī mire baare meñ hai likkhā bahut

maiñ kharā utrā nahīñ tere taqāze par kabhī

zindagī ai zindagī tujh se huuñ sharminda bahut

bas anā ke bojh ne nazreñ mirī uThne na diiñ

us kī jānib dekhne ko jī mirā chāhā bahut

maiñ ne pūchhā ye batā mujh se bichhaḌne kā tujhe

kuchh qalaq hotā hai kyā us ne kahā thoḌā bahut

ghar hamārā phūñk kar kal ik paḌosī ai 'atīq'

do ghaḌī to hañs liyā phir baad meñ royā bahut

chand lamhon ko sahi tha sath mein rahna bahut

ek bas tere na hone se hai sannaTa bahut

zabt ka suraj bhi aaKHir sham ko Dhal hi gaya

gham ka baadal ban ke aansu raat bhar barsa bahut

dushmanon ko koi bhi mauqa na milne paega

doston ne hi mere bare mein hai likkha bahut

main khara utra nahin tere taqaze par kabhi

zindagi ai zindagi tujh se hun sharminda bahut

bas ana ke bojh ne nazren meri uThne na din

us ki jaanib dekhne ko ji mera chaha bahut

main ne puchha ye bata mujh se bichhaDne ka tujhe

kuchh qalaq hota hai kya us ne kaha thoDa bahut

ghar hamara phunk kar kal ek paDosi ai 'atiq'

do ghaDi to hans liya phir baad mein roya bahut