chashm-e-KHana maqam-e-dard ka hai

chashm-e-ḳhāna maqām-e-dard kā hai

har nazāre pe naam dard kā hai

sarhad-e-jāñ talak qalam-rau dil

is se aage nizām dard kā hai

be-talab jur.at-e-huzūrī kyā

ashk adnā ġhulām dard kā hai

dam-ba-ḳhud tāb-e-dīd zo.am-e-suḳhan

ḳhāmushī se kalām dard kā hai

ruuh ke ġham-kade pe qahr-e-sukūt

asar-e-intiqām dard kā hai

ek dhaḌkan pe ek hashr uThā.eñ

chup jo haiñ ehtirām dard kā hai

bujh ga.iiñ vo ġhazāl āñkheñ bhī

jin se tābinda naam dard kā hai

ḳhushk āñkhoñ se ḳhushk dāman tak

ye safar gaam gaam dard kā hai

sar-e-mizhgān-e-surmagīñ larzāñ

tā.ir-e-zer-e-dām dard kā hai

chashm-e-KHana maqam-e-dard ka hai

har nazare pe nam dard ka hai

sarhad-e-jaan talak qalam-rau dil

is se aage nizam dard ka hai

be-talab jurat-e-huzuri kya

ashk adna ghulam dard ka hai

dam-ba-KHud tab-e-did zoam-e-suKHan

KHamushi se kalam dard ka hai

ruh ke gham-kade pe qahr-e-sukut

asar-e-intiqam dard ka hai

ek dhaDkan pe ek hashr uThaen

chup jo hain ehtiram dard ka hai

bujh gain wo ghazal aankhen bhi

jin se tabinda nam dard ka hai

KHushk aankhon se KHushk daman tak

ye safar gam gam dard ka hai

sar-e-mizhgan-e-surmagin larzan

tair-e-zer-e-dam dard ka hai