chheD kar tazkira-e-daur-e-jawani roya

chheḌ kar tazkira-e-daur-e-javānī royā

raat yāroñ ko sunā kar maiñ kahānī royā

zikr thā kūcha o bāzār ke hañgāmoñ kā

jaane kyā soch ke vo yūsuf-e-sānī royā

ġhairat-e-ishq ne kyā kyā na bahā.e aañsū

sun ke bāteñ tirī ġhairoñ kī zabānī royā

jab bhī dekhī hai kisī chehre pe ik taaza bahār

dekh kar maiñ tirī tasvīr purānī royā

chashm-e-arbāb-e-vafā hai jo lahū rotī hai

ġhair phir ġhair hai royā bhī to paanī royā

terī mahkī huī sāñsoñ kī laveñ yaad aa.iiñ

aaj to dekh ke maiñ sub.h suhānī royā

ai vatan jab bhī sar-e-dasht koī phuul khilā

dekh kar tere shahīdoñ kī nishānī royā

chheD kar tazkira-e-daur-e-jawani roya

raat yaron ko suna kar main kahani roya

zikr tha kucha o bazar ke hangamon ka

jaane kya soch ke wo yusuf-e-sani roya

ghairat-e-ishq ne kya kya na bahae aansu

sun ke baaten teri ghairon ki zabani roya

jab bhi dekhi hai kisi chehre pe ek taza bahaar

dekh kar main teri taswir purani roya

chashm-e-arbab-e-wafa hai jo lahu roti hai

ghair phir ghair hai roya bhi to pani roya

teri mahki hui sanson ki lawen yaad aain

aaj to dekh ke main subh suhani roya

ai watan jab bhi sar-e-dasht koi phul khila

dekh kar tere shahidon ki nishani roya