daraKHt-e-jaan par azab-rut thi na barg jage na phul aae

daraḳht-e-jāñ par azāb-rut thī na barg jaage na phuul aa.e

bahār-vādī se jitne panchhī idhar ko aa.e malūl aa.e

nashāt-e-manzil nahīñ to un ko koī sā ajr-e-safar hī de do

vo rah-navard-e-rah-e-junūñ jo pahan ke rāhoñ kī dhuul aa.e

vo saarī ḳhushiyāñ jo us ne chāhīñ uThā ke jholī meñ apnī rakh liiñ

hamāre hisse meñ uzr aa.e javāz aa.e usuul aa.e

ab aise qisse se fā.eda kyā ki kaun kitnā vafā-nigar thā

jab us kī mahfil se aa ga.e aur saarī bāteñ hī bhuul aa.e

vafā kī nagrī luTī to us ke asāsoñ kā bhī hisāb Thahrā

kisī ke hisse meñ zaḳhm aa.e kisī ke hisse meñ phuul aa.e

ba-nām-e-fasl-e-bahār 'āzar' vo zard patte hī mo'tabar the

jo hañs ke rizq-e-ḳhizāñ hue haiñ jo sabz shāḳhoñ pe jhuul aa.e

daraKHt-e-jaan par azab-rut thi na barg jage na phul aae

bahaar-wadi se jitne panchhi idhar ko aae malul aae

nashat-e-manzil nahin to un ko koi sa ajr-e-safar hi de do

wo rah-naward-e-rah-e-junun jo pahan ke rahon ki dhul aae

wo sari KHushiyan jo us ne chahin uTha ke jholi mein apni rakh lin

hamare hisse mein uzr aae jawaz aae usul aae

ab aise qisse se faeda kya ki kaun kitna wafa-nigar tha

jab us ki mahfil se aa gae aur sari baaten hi bhul aae

wafa ki nagri luTi to us ke asason ka bhi hisab Thahra

kisi ke hisse mein zaKHm aae kisi ke hisse mein phul aae

ba-nam-e-fasl-e-bahaar 'azar' wo zard patte hi mo'tabar the

jo hans ke rizq-e-KHizan hue hain jo sabz shaKHon pe jhul aae