dasht-e-tanhai baadal hawa aur main

dasht-e-tanhā.ī bādal havā aur maiñ

roz o shab kā yahī silsilā aur maiñ

ajnabī rāstoñ par bhaTakte rahe

ārzūoñ kā ik qāfila aur maiñ

donoñ un kī tavajjoh ke haqdār haiñ

mujh pe guzrā thā jo sāniha aur maiñ

saikḌoñ ġham mire saath chalte rahe

jis ko chhoḌā usī ne kahā aur maiñ

raushnī āgahī aur zinda-dilī

in harīfoñ se thā vāstā aur maiñ

der tak mil ke rote rahe raah meñ

un se baḌhtā huā fāslā aur maiñ

jab bhī sochā to bas sochtā rah gayā

zindagānī tirā marhalā aur maiñ

tanz dushnām lā'nat adāvat hasad

in rafīqoñ kā saaya rahā aur maiñ

dasht-e-tanhai baadal hawa aur main

roz o shab ka yahi silsila aur main

ajnabi raston par bhaTakte rahe

aarzuon ka ek qafila aur main

donon un ki tawajjoh ke haqdar hain

mujh pe guzra tha jo saniha aur main

saikDon gham mere sath chalte rahe

jis ko chhoDa usi ne kaha aur main

raushni aagahi aur zinda-dili

in harifon se tha wasta aur main

der tak mil ke rote rahe rah mein

un se baDhta hua fasla aur main

jab bhi socha to bas sochta rah gaya

zindagani tera marhala aur main

tanz dushnam la'nat adawat hasad

in rafiqon ka saya raha aur main