dawa-e-dard-e-gham-o-iztirab kya deta

davā-e-dard-e-ġham-o-iztirāb kyā detā

vo merī āñkhoñ ko rañgīn ḳhvāb kyā detā

thī merī āñkhoñ kī qismat meñ tishnagī likkhī

vo apnī diid kī mujh ko sharāb kyā detā

kiyā savāl jo maiñ ne vafā ke qātil se

zabāñ pe qufl lagā thā javāb kyā detā

maiñ chāhtā thā ki us ko gulāb pesh karūñ

vo ḳhud gulāb thā us ko gulāb kyā detā

vo jis ne dekhā nahīñ ishq kā kabhī maktab

maiñ us ke haath meñ dil kī kitāb kyā detā

mire nasīb meñ miTTī kā ik diyā bhī na thā

tirī hathelī pe maiñ āftāb kyā detā

maiñ us se pyaas kā shikva na kar sakā 'afzal'

jo ḳhud hī tishna thā vo mujh ko aab kyā detā

dawa-e-dard-e-gham-o-iztirab kya deta

wo meri aankhon ko rangin KHwab kya deta

thi meri aankhon ki qismat mein tishnagi likkhi

wo apni did ki mujh ko sharab kya deta

kiya sawal jo main ne wafa ke qatil se

zaban pe qufl laga tha jawab kya deta

main chahta tha ki us ko gulab pesh karun

wo KHud gulab tha us ko gulab kya deta

wo jis ne dekha nahin ishq ka kabhi maktab

main us ke hath mein dil ki kitab kya deta

mere nasib mein miTTi ka ek diya bhi na tha

teri hatheli pe main aaftab kya deta

main us se pyas ka shikwa na kar saka 'afzal'

jo KHud hi tishna tha wo mujh ko aab kya deta