dekh qindil ruKH-e-yar ki jaanib mat dekh

dekh qindīl ruḳh-e-yār kī jānib mat dekh

tez talvār hai talvār kī jānib mat dekh

bol kitnī hai tire sāmne qīmat merī

chhoḌ bāzār ko bāzār kī jānib mat dekh

dekhnā hai to mujhe dekh ki maiñ kaisā huuñ

mere ujḌe hue ghar-bār kī jānib mat dekh

aur baḌh jā.egī tanhā.ī tujhe kyā ma.alūm

aisī tanhā.ī meñ dīvār kī jānib mat dekh

aage niklā hai to phir aage nikaltā chalā jā

pīchhe haTte hue sālār kī jānib mat dekh

tū mire sāmne aayā hai to phir dekh mujhe

merī TuuTī huī talvār kī jānib mat dekh

tū kahānī ke badalte hue manzar ko samajh

ḳhuun rote hue kirdār kī jānib mat dekh

terā dil hī na kahīñ kaaT ke rakh de 'az.har'

aañkh se girtī huī dhaar kī jānib mat dekh

dekh qindil ruKH-e-yar ki jaanib mat dekh

tez talwar hai talwar ki jaanib mat dekh

bol kitni hai tere samne qimat meri

chhoD bazar ko bazar ki jaanib mat dekh

dekhna hai to mujhe dekh ki main kaisa hun

mere ujDe hue ghar-bar ki jaanib mat dekh

aur baDh jaegi tanhai tujhe kya malum

aisi tanhai mein diwar ki jaanib mat dekh

aage nikla hai to phir aage nikalta chala ja

pichhe haTte hue salar ki jaanib mat dekh

tu mere samne aaya hai to phir dekh mujhe

meri TuTi hui talwar ki jaanib mat dekh

tu kahani ke badalte hue manzar ko samajh

KHun rote hue kirdar ki jaanib mat dekh

tera dil hi na kahin kaT ke rakh de 'azhar'

aankh se girti hui dhaar ki jaanib mat dekh