dekhun wo karti hai ab ke alam-arai ki main

dekhūñ vo kartī hai ab ke alam-ārā.ī ki maiñ

hārtā kaun hai is jañg meñ tanhā.ī ki maiñ

bhuul baiThā huuñ ki aflāk bhī kuchh hote haiñ

apnī vus.at meñ milī mujh ko vo gahrā.ī ki maiñ

aaj tak apnī rihā.ī kī duā kartā huuñ

ab ke zanjīr havāoñ ne vo pahnā.ī ki maiñ

ḳhud ko paane lagā tanhā.ī kī tārīkī meñ

is qadar shoḳh huā rañg-e-shanāsā.ī ki maiñ

rañg-e-tābīr añdheroñ se uThā letā huuñ

kaun ḳhvāboñ ko atā kartā hai bīnā.ī ki maiñ

gosha-e-dasht meñ yūñhī to nahīñ baiThā huuñ

safar āsān karegā koī saudā.ī ki maiñ

us kī har baat pe īmān nahīñ rakhtā huuñ

kuchh to tahrīr pe ho hāshiya-ārā.ī ki maiñ

rakhne vaalā huuñ qadam qarya-e-shohrat meñ 'hasan'

hamla-āvar na kahīñ ho sag-e-rusvā.ī ki maiñ

dekhun wo karti hai ab ke alam-arai ki main

haarta kaun hai is jang mein tanhai ki main

bhul baiTha hun ki aflak bhi kuchh hote hain

apni wusat mein mili mujh ko wo gahrai ki main

aaj tak apni rihai ki dua karta hun

ab ke zanjir hawaon ne wo pahnai ki main

KHud ko pane laga tanhai ki tariki mein

is qadar shoKH hua rang-e-shanasai ki main

rang-e-tabir andheron se uTha leta hun

kaun KHwabon ko ata karta hai binai ki main

gosha-e-dasht mein yunhi to nahin baiTha hun

safar aasan karega koi saudai ki main

us ki har baat pe iman nahin rakhta hun

kuchh to tahrir pe ho hashiya-arai ki main

rakhne wala hun qadam qarya-e-shohrat mein 'hasan'

hamla-awar na kahin ho sag-e-ruswai ki main