deta hai mujhko charKH-e-kuhan bar bar dagh

detā hai mujh ko charḳh-e-kuhan baar baar daaġh

uf ek merā siina hai us par hazār daaġh

dete haiñ mere siine meñ kyā hī bahār daaġh

khaa.e na un ko dekh ke kyuuñ lāla-zār daaġh

laala karegā dil kī mire kyā barābarī

us par hai ek daaġh yahāñ be-shumār daaġh

duniyā ke saare sadme haiñ kam hijr-e-yār se

de mudda.ī ko bhī na ye parvardigār daaġh

rakhtā hai ishq-e-lāla-ruḳhāñ dil meñ vo nihāñ

siine pe māhtāb ke hai āshkār daaġh

zulmat se dī najāt dil-e-dāġhdār ne

raushan misāl-e-sham.a hai zer-e-mazār daaġh

har dam na kyuuñ lagā.e rakheñ siine se use

ik māh-rū ke ishq kī hai yādgār daaġh

qātil mire lahū ne bhī kyā gul khilā.e haiñ

dāman pe tere dete haiñ kyā hī bahār daaġh

jo zulm chāhe rakh dil-e-'ranjūr' par ravā

de tū magar use na judā.ī kā yaar daaġh

deta hai mujh ko charKH-e-kuhan bar bar dagh

uf ek mera sina hai us par hazar dagh

dete hain mere sine mein kya hi bahaar dagh

khae na un ko dekh ke kyun lala-zar dagh

lala karega dil ki mere kya barabari

us par hai ek dagh yahan be-shumar dagh

duniya ke sare sadme hain kam hijr-e-yar se

de muddai ko bhi na ye parwardigar dagh

rakhta hai ishq-e-lala-ruKHan dil mein wo nihan

sine pe mahtab ke hai aashkar dagh

zulmat se di najat dil-e-daghdar ne

raushan misal-e-shama hai zer-e-mazar dagh

har dam na kyun lagae rakhen sine se use

ek mah-ru ke ishq ki hai yaadgar dagh

qatil mere lahu ne bhi kya gul khilae hain

daman pe tere dete hain kya hi bahaar dagh

jo zulm chahe rakh dil-e-'ranjur' par rawa

de tu magar use na judai ka yar dagh