dhanak dhanak meri poron ke KHwab kar dega

dhanak dhanak mirī poroñ ke ḳhvāb kar degā

vo lams mere badan ko gulāb kar degā

qabā-e-jism ke har taar se guzartā huā

kiran kā pyaar mujhe āftāb kar degā

junūñ-pasand hai dil aur tujh tak aane meñ

badan ko naav lahū ko chanāb kar degā

maiñ sach kahūñgī magar phir bhī haar jā.ūñgī

vo jhuuT bolegā aur lā-javāb kar degā

anā-parast hai itnā ki baat se pahle

vo uTh ke band mirī har kitāb kar degā

sukūt-e-shahr-e-suḳhan meñ vo phuul sā lahja

samā.atoñ kī fazā ḳhvāb ḳhvāb kar degā

isī tarah se agar chāhtā rahā paiham

suḳhan-varī meñ mujhe intiḳhāb kar degā

mirī tarah se koī hai jo zindagī apnī

tumhārī yaad ke naam intisāb kar degā

dhanak dhanak meri poron ke KHwab kar dega

wo lams mere badan ko gulab kar dega

qaba-e-jism ke har tar se guzarta hua

kiran ka pyar mujhe aaftab kar dega

junun-pasand hai dil aur tujh tak aane mein

badan ko naw lahu ko chanab kar dega

main sach kahungi magar phir bhi haar jaungi

wo jhuT bolega aur la-jawab kar dega

ana-parast hai itna ki baat se pahle

wo uTh ke band meri har kitab kar dega

sukut-e-shahr-e-suKHan mein wo phul sa lahja

samaaton ki faza KHwab KHwab kar dega

isi tarah se agar chahta raha paiham

suKHan-wari mein mujhe intiKHab kar dega

meri tarah se koi hai jo zindagi apni

tumhaari yaad ke nam intisab kar dega