dhima dhima dard suhana hum ko achchha lagta tha

dhīmā dhīmā dard suhānā ham ko achchhā lagtā thā

dukhte jī ko aur dukhānā ham ko achchhā lagtā thā

zaḳhm ko apne phuul samajhnā motī kahnā ashkoñ ko

ishq kā kārobār sajānā ham ko achchhā lagtā thā

din din bhar āvāra phirnā ek hamārī aadat thī

raat ga.e ghar lauT ke aanā ham ko achchhā lagtā thā

baiTh ke yāroñ kī mahfil meñ piite rahnā der talak

apne-āp ko bhuul hī jaanā ham ko achchhā lagtā thā

chup chup rahnā aaheñ bharnā kuchh bhī na kahnā logoñ se

tanhā tanhā ashk bahānā ham ko achchhā lagtā thā

shāḳh se TuuTe sūkhe patte tez havā ke shānoñ par

shahroñ shahroñ ḳhaak uḌānā ham ko achchhā lagtā thā

shahr-e-ġham kī ek udāsī dil meñ har-dam rahtī thī

dīvāroñ se sar Takrānā ham ko achchhā lagtā thā

gul-badanoñ ko takte rahnā bāteñ karnā ḳhushbū kī

nigah-e-gul kā qarz chukānā ham ko achchhā lagtā thā

nashsha-e-ġham kī sarshārī bhī kam to nahīñ thī phir bhī 'adīb'

talḳhī-e-mai meñ zahr milānā ham ko achchhā lagtā thā

dhima dhima dard suhana hum ko achchha lagta tha

dukhte ji ko aur dukhana hum ko achchha lagta tha

zaKHm ko apne phul samajhna moti kahna ashkon ko

ishq ka karobar sajaana hum ko achchha lagta tha

din din bhar aawara phirna ek hamari aadat thi

raat gae ghar lauT ke aana hum ko achchha lagta tha

baiTh ke yaron ki mahfil mein pite rahna der talak

apne-ap ko bhul hi jaana hum ko achchha lagta tha

chup chup rahna aahen bharna kuchh bhi na kahna logon se

tanha tanha ashk bahana hum ko achchha lagta tha

shaKH se TuTe sukhe patte tez hawa ke shanon par

shahron shahron KHak uDana hum ko achchha lagta tha

shahr-e-gham ki ek udasi dil mein har-dam rahti thi

diwaron se sar Takrana hum ko achchha lagta tha

gul-badanon ko takte rahna baaten karna KHushbu ki

nigah-e-gul ka qarz chukana hum ko achchha lagta tha

nashsha-e-gham ki sarshaari bhi kam to nahin thi phir bhi 'adib'

talKHi-e-mai mein zahr milana hum ko achchha lagta tha