din o dil pahli hi manzil mein yahan kaam aae

diin o dil pahlī hī manzil meñ yahāñ kaam aa.e

aur ham rāh-e-vafā meñ koī do gaam aa.e

tum kaho ahl-e-ḳhirad ishq meñ kyā kyā biitī

ham to is raah meñ nā-vāqif-e-anjām aa.e

lazzat-e-dard milī ishrat-e-ehsās milī

kaun kahtā hai ham us bazm se nākām aa.e

vo bhī kyā din the ki ik qatra-e-mai bhī na milā

aaj aa.e to ka.ī baar ka.ī jaam aa.e

ik hasīñ yaad se vābasta haiñ lākhoñ yādeñ

ashk umañD aate haiñ jab lab pe tirā naam aa.e

sī liye hoñT magar dil meñ ḳhalish rahtī hai

is ḳhamoshī kā kahīñ un pe na ilzām aa.e

chand dīvānoñ se raushan thī galī ulfat kī

varna fānūs to lākhoñ hī sar-e-bām aa.e

ye bhī badle hue hālāt kā partav hai ki vo

ḳhalvat-e-ḳhās se tā jalva-gah-e-ām aa.e

ho ke māyūs maiñ paimāna bhī jab toḌ chukā

chashm-e-sāqī se piyā pe ka.ī paiġhām aa.e

shahr meñ pahle se badnām the yuuñ bhī 'zaidī'

ho ke mai-ḳhāne se kuchh aur bhī badnām aa.e

din o dil pahli hi manzil mein yahan kaam aae

aur hum rah-e-wafa mein koi do gam aae

tum kaho ahl-e-KHirad ishq mein kya kya biti

hum to is rah mein na-waqif-e-anjam aae

lazzat-e-dard mili ishrat-e-ehsas mili

kaun kahta hai hum us bazm se nakaam aae

wo bhi kya din the ki ek qatra-e-mai bhi na mila

aaj aae to kai bar kai jam aae

ek hasin yaad se wabasta hain lakhon yaaden

ashk umanD aate hain jab lab pe tera nam aae

si liye honT magar dil mein KHalish rahti hai

is KHamoshi ka kahin un pe na ilzam aae

chand diwanon se raushan thi gali ulfat ki

warna fanus to lakhon hi sar-e-baam aae

ye bhi badle hue haalat ka partaw hai ki wo

KHalwat-e-KHas se ta jalwa-gah-e-am aae

ho ke mayus main paimana bhi jab toD chuka

chashm-e-saqi se piya pe kai paigham aae

shahr mein pahle se badnam the yun bhi 'zaidi'

ho ke mai-KHane se kuchh aur bhi badnam aae