diwangi ne KHub karishme dikhae hain

dīvāngī ne ḳhuub karishme dikhā.e haiñ

aksar tire baġhair bhī ham muskurā.e haiñ

ab ai ġham-e-zamāna tirā kyā ḳhayāl hai

ham apne saath le ke ġham-e-ishq aa.e haiñ

mai-ḳhāne kī taraf jo baḌhe haiñ to hoshiyār

ka.aba kā ruḳh kiyā hai to ham Dagmagā.e haiñ

ik sub.h-e-zar-nigār kī ḳhātir tamām raat

ham ne ka.ī charāg jalā.e bujhā.e haiñ

ham par bhī rahguzār-e-mohabbat ko naaz hai

ham ne bhī kuchh nuqūsh miTā kar banā.e haiñ

yuuñ bhī milī hai mujh ko mire zabt-e-ġham kī daad

aksar vo sar jhukā.e hue muskurā.e haiñ

hairat se dekhtā hai zamāna hameñ 'ayāz'

us tak pahuñch pahuñch ke jo ham lauT aa.e haiñ

diwangi ne KHub karishme dikhae hain

aksar tere baghair bhi hum muskurae hain

ab ai gham-e-zamana tera kya KHayal hai

hum apne sath le ke gham-e-ishq aae hain

mai-KHane ki taraf jo baDhe hain to hoshiyar

kaba ka ruKH kiya hai to hum Dagmagae hain

ek subh-e-zar-nigar ki KHatir tamam raat

hum ne kai charag jalae bujhae hain

hum par bhi rahguzar-e-mohabbat ko naz hai

hum ne bhi kuchh nuqush miTa kar banae hain

yun bhi mili hai mujh ko mere zabt-e-gham ki dad

aksar wo sar jhukae hue muskurae hain

hairat se dekhta hai zamana hamein 'ayaz'

us tak pahunch pahunch ke jo hum lauT aae hain