dil bhar aaya phir bhi raaz-e-dil chhupana hi paDa

dil bhar aayā phir bhī rāz-e-dil chhupānā hī paḌā

sāmne us bad-gumāñ ke muskurānā hī paḌā

vo jo rūThe maiñ ne bhī khā lī na milne kī qasam

phir na dil maanā to ḳhud jā kar manānā hī paḌā

uf rī majbūrī mizāj-e-yār meñ ho kar daḳhīl

rāzdāñ ḳhud apne dushman ko banānā hī paḌā

mujh ko fasl-e-gul meñ tevar dekh kar sayyād ke

āshiyāna chhoḌ kar gulshan se jaanā hī paḌā

zabt kā yaarā nahīñ sayyād kā bhī hai ḳhayāl

nāla-e-dil-soz ko naġhma banānā hī paḌā

rokte kab tak taqāzā-e-talāfī-e-sitam

sar jhukā.e sharm se mayyat pe aanā hī paḌā

aaj 'anjum' muskurā kar us ne phir dekhā mujhe

shikva-e-jaur-o-jafā phir bhuul jaanā hī paḌā

dil bhar aaya phir bhi raaz-e-dil chhupana hi paDa

samne us bad-guman ke muskurana hi paDa

wo jo ruThe main ne bhi kha li na milne ki qasam

phir na dil mana to KHud ja kar manana hi paDa

uf ri majburi mizaj-e-yar mein ho kar daKHil

raazdan KHud apne dushman ko banana hi paDa

mujh ko fasl-e-gul mein tewar dekh kar sayyaad ke

aashiyana chhoD kar gulshan se jaana hi paDa

zabt ka yara nahin sayyaad ka bhi hai KHayal

nala-e-dil-soz ko naghma banana hi paDa

rokte kab tak taqaza-e-talafi-e-sitam

sar jhukae sharm se mayyat pe aana hi paDa

aaj 'anjum' muskura kar us ne phir dekha mujhe

shikwa-e-jaur-o-jafa phir bhul jaana hi paDa