dil-e-barbaad mein phir uski tamanna kyun hai

dil-e-barbād meñ phir us kī tamannā kyuuñ hai

har taraf shaam hai lekin ye ujālā kyuuñ hai

jis kī yādoñ ke diye ham ne bujhā rakkhe haiñ

phir vahī shaḳhs tasavvur meñ utartā kyuuñ hai

jāntā huuñ vo musāfir hai safar kartā hai

qarya-e-jāñ meñ magar aaj vo Thahrā kyuuñ hai

thak chukā hai tū añdheroñ meñ rahe merī tarah

chāñd ko kis kī talab hai ye nikaltā kyuuñ hai

maiñ vahī ḳhvāb huuñ palkoñ pe sajāyā thā jise

aaj ġhairoñ kī tarah tum ne pukārā kyuuñ hai

roz ik baat mire dil ko satātī hai 'ziyā'

is qadar TuuT ke tum ne use chāhā kyuuñ hai

dil-e-barbaad mein phir us ki tamanna kyun hai

har taraf sham hai lekin ye ujala kyun hai

jis ki yaadon ke diye hum ne bujha rakkhe hain

phir wahi shaKHs tasawwur mein utarta kyun hai

jaanta hun wo musafir hai safar karta hai

qarya-e-jaan mein magar aaj wo Thahra kyun hai

thak chuka hai tu andheron mein rahe meri tarah

chand ko kis ki talab hai ye nikalta kyun hai

main wahi KHwab hun palkon pe sajaya tha jise

aaj ghairon ki tarah tum ne pukara kyun hai

roz ek baat mere dil ko satati hai 'ziya'

is qadar TuT ke tum ne use chaha kyun hai