dil ki basti mein barasta hai wo baadal kaun hai

dil kī bastī meñ barastā hai vo bādal kaun hai

kar rahā hai jo mirī āñkhoñ ko jal-thal kaun hai

chāñd sūraj kahkashāñ kī pūchhtā hai ḳhairiyat

sab ke ghar meñ jhāñkne vaalā ye pāgal kaun hai

kaun hai vo jis kī ḳhushbū se mahaktī hai hayāt

gholne vaalā mirī sāñsoñ meñ sandal kaun hai

dhuup bārish āñdhiyoñ meñ sā.ebāñ hotā hai kaun

phuul ko detā hai jo mamtā kā āñchal kaun hai

raat ke bistar bhigo jaatā hai shabnam kī tarah

dhone vaalā niiñd kī āñkhoñ se kājal kaun hai

shabnamī hai guftugū us kī to lahja hai gulāb

pankhuḌī sā narm itnā aur komal kaun hai

dil ke vīrāne meñ chupke se chalā aatā hai kaun

ġham kī bastī meñ machātā hai jo halchal kaun hai

rah ga.ī hai kuchh kamī to kyā shikāyat hai 'fahīm'

is jahāñ meñ sab adhūre haiñ mukammal kaun hai

dil ki basti mein barasta hai wo baadal kaun hai

kar raha hai jo meri aankhon ko jal-thal kaun hai

chand suraj kahkashan ki puchhta hai KHairiyat

sab ke ghar mein jhankne wala ye pagal kaun hai

kaun hai wo jis ki KHushbu se mahakti hai hayat

gholne wala meri sanson mein sandal kaun hai

dhup barish aandhiyon mein saeban hota hai kaun

phul ko deta hai jo mamta ka aanchal kaun hai

raat ke bistar bhigo jata hai shabnam ki tarah

dhone wala nind ki aankhon se kajal kaun hai

shabnami hai guftugu us ki to lahja hai gulab

pankhuDi sa narm itna aur komal kaun hai

dil ke virane mein chupke se chala aata hai kaun

gham ki basti mein machata hai jo halchal kaun hai

rah gai hai kuchh kami to kya shikayat hai 'fahim'

is jahan mein sab adhure hain mukammal kaun hai