dil ki ek harf-o-hikayat hai ye bhi na sahi

dil kī ik harf-o-hikāyāt hai ye bhī na sahī

gar mirī baat meñ kuchh baat hai ye bhī na sahī

iid ko bhī vo nahīñ milte haiñ mujh se na mileñ

ik baras din kī mulāqāt hai ye bhī na sahī

dil meñ jo kuchh hai tumhāre nahīñ pinhāñ mujh se

zāhirī lutf o mudārāt hai ye bhī na sahī

zindagī hijr meñ bhī yuuñ hī guzar jā.egī

vasl kī ek hī gar raat hai ye bhī na sahī

merī turbat pe lagāte nahīñ Thokar na lagāo

ye hī bas un kī karāmāt hai ye bhī na sahī

kaaT sakte haiñ galā ḳhud bhī na kiije hameñ qatl

aap ke haath meñ ik baat hai ye bhī na sahī

qatl-e-qāsid pe kamar bāñdhī hai 'shola' us ne

ḳhat kitābat kī mulāqāt hai ye bhī na sahī

dil ki ek harf-o-hikayat hai ye bhi na sahi

gar meri baat mein kuchh baat hai ye bhi na sahi

id ko bhi wo nahin milte hain mujh se na milen

ek baras din ki mulaqat hai ye bhi na sahi

dil mein jo kuchh hai tumhaare nahin pinhan mujh se

zahiri lutf o mudaraat hai ye bhi na sahi

zindagi hijr mein bhi yun hi guzar jaegi

wasl ki ek hi gar raat hai ye bhi na sahi

meri turbat pe lagate nahin Thokar na lagao

ye hi bas un ki karamat hai ye bhi na sahi

kaT sakte hain gala KHud bhi na kije hamein qatl

aap ke hath mein ek baat hai ye bhi na sahi

qatl-e-qasid pe kamar bandhi hai 'shola' us ne

KHat kitabat ki mulaqat hai ye bhi na sahi