dilon ke dard jaga KHwahishon ke KHwab saja

diloñ ke dard jagā ḳhvāhishoñ ke ḳhvāb sajā

balā-kashān-e-nazar ke liye sarāb sajā

mahak rahā hai kisī kā badan sar-e-mahtāb

mire ḳhayāl kī Tahnī pe kyā gulāb sajā

koī kahīñ to sune tere arz-e-hāl kā habs

havā kī rehl pe āvāz kī kitāb sajā

vo kyā talab thī tire jism ke ujāle kī

maiñ bujh gayā to mirā ḳhāna-e-ḳharāb sajā

tamām shab thā tirā hijr terā ā.īna-gar

tamām shab mire pahlū meñ āftāb sajā

na tū hai aur na maiñ huuñ na vasl hai na firāq

sajā sharāb sajā jā-ba-jā sharāb sajā

'atā' ye aañkh dhanak manziloñ kī chaah meñ thī

chhaTā jo abr ghanī tīrgī kā baab sajā

dilon ke dard jaga KHwahishon ke KHwab saja

bala-kashan-e-nazar ke liye sarab saja

mahak raha hai kisi ka badan sar-e-mahtab

mere KHayal ki Tahni pe kya gulab saja

koi kahin to sune tere arz-e-haal ka habs

hawa ki rehl pe aawaz ki kitab saja

wo kya talab thi tere jism ke ujale ki

main bujh gaya to mera KHana-e-KHarab saja

tamam shab tha tera hijr tera aaina-gar

tamam shab mere pahlu mein aaftab saja

na tu hai aur na main hun na wasl hai na firaq

saja sharab saja ja-ba-ja sharab saja

'ata' ye aankh dhanak manzilon ki chah mein thi

chhaTa jo abr ghani tirgi ka bab saja