dilon mein Khaar labon par gila milega mujhe

diloñ meñ ḳhaar laboñ par gila milegā mujhe

ḳhafā rahegā zamāna to kyā milegā mujhe

ye kyā ḳhabar thī mulāqāt un se hogī agar

nazar se tā-ba-nazar fāsla milegā mujhe

Tilism-e-tīrgi-e-shab kahīñ to TūTegā

koī charāġh kahīñ to jalā milegā mujhe

bahār-e-bāġh-e-tamannā koī to dekhegā

kabhī to dil meñ koī jhāñktā milegā mujhe

zamāna hogā tire saath rah-guzar meñ jahāñ

miTā miTā sā tirā naqsh-e-pā milegā mujhe

Dareñge log vafā ke ḳhayāl se 'nazmī'

mirī vafāoñ kā jis din sila milegā mujhe

dilon mein KHar labon par gila milega mujhe

KHafa rahega zamana to kya milega mujhe

ye kya KHabar thi mulaqat un se hogi agar

nazar se ta-ba-nazar fasla milega mujhe

Tilism-e-tirgi-e-shab kahin to TuTega

koi charagh kahin to jala milega mujhe

bahaar-e-bagh-e-tamanna koi to dekhega

kabhi to dil mein koi jhankta milega mujhe

zamana hoga tere sath rah-guzar mein jahan

miTa miTa sa tera naqsh-e-pa milega mujhe

Darenge log wafa ke KHayal se 'nazmi'

meri wafaon ka jis din sila milega mujhe